Nagsungka ang aktres nga si Rufa Mae Quinto sa National Bureau of Investigation (NBI) kadungan sang iya pagbalik sa Pilipinas kahapon sang aga, Enero 8.
Ini matapos nga ginkumpirmar sang iya kampo ang pag-issue sang arrest warrant batok sa komedyante sang nagligad nga bulan bangud sa ginaalegar nga kaangtanan sini sa isa ka investment scam.
Suno kay NBI International Airport Investigation Division Chief Jimmy De Leon, nakig-angot ang abogado ni Rufa sa mga otoridad para sa iya boluntaryo nga pagsungka.
Dugang pa niya nga pagadal-on ang aktres sa Pasay court nga amo ang nag-issue sang arrest warrant batok sa iya.
Sa karon, nagapangatubang si Rufa sang 14 counts of violation sa Section 8 sang Securities Regulation Code angot sa mga kaso nga ginpasaka sang mga investors batok sa skin care company nga Dermacare.
