Ginkumpirmar sang gobernador sang Negros Occidental nga napadala na kahapon sa Philippine Genome Center sa Manila ang sample sang mag-asawa nagikan sa London nga nag-abot sa Negros Occidental sang Enero 16 nga nagpositibo sa COVID test agud matumod kun new variant sang virus ang nakalaton sa mga ini.
Madumduman nga gindeklarar sang mag-asawa ang ila kaugalingon nga Locally Stranded Individuals (LSI) sa baylo nga Returning Overseas Filipinos.
Nagtilaw pa ang mga ini nga magsakay sang Enero 2, 2021 sa eroplano papauli sa Negros Occidental apang ginbalibaran sang airline bangud nagikan ang mga ini sa London.
Sang Enero 16, nagsakay sila sa Air Asia flight apang gindeklarar nila ang kaugalingon nga LSI.
Sa interview sang Bombo Radyo Bacolod kay Governor Eugenio Jose “Bong” Lacson, ginpahayag sini nga kahapon ginpadala na nila ang sample sang duha sa Manila agud matumod kun UK variant sang virus ang nakalaton sa mga ini.
Ginalantaw naman sang gobernador nga posible sa Lunes magagwa ang resulta sang sample sang mag-asawa.
Apisar nga indi mas makamamatay, apang mas makalalaton ang bag-o nga strain sang COVID-19 gani nagalaom si Lacson nga indi masudlan sang bag-o nga variant ang probinsya bangud mabudlayan naman ang tanan.
