Ginkumpirmar sang chairman sang committee on health and sanitation sa Sangguniang Panlungsod nga nagpasar sila sang duha ka resolusyon sang Miyerkules angot sa pagtapna sa African Swine Fever.
Sa interview sang Bombo Radyo Bacolod kay Councilor Claudio Jesus Raymundo “Kalaw” Puentevella, una nga resolusyon ang pagmandu kay Bacolod City Veterinarian Dr. Agueda Dela Torre nga tinguhaan nga hugton ang pagbantay nga indi na maglapta pa ang kaso sang African Swine Fever sa syudad sang Bacolod.
Suno kay Puentevella, nakalab-ot na sa ila nga may yara na sang ginhungod patay nga mga baboy ukon ginculling agud nga indi na ini maglapta pa.
Ini matapos nga narecord sa Barangay Taculing kag Barangay Tangub ang kumpirmado nga kaso sang ASF, santo sa confirmatory test result nga ginpagwa sang Bureau of Animal Industry.
Samtang ang isa ka resolusyon ang pagpanawagan sa alkalde sang syudad nga magbutang sang border control agud nga malikawan ang pagpasulod sang mga baboy kag pork products sa syudad sang Bacolod.
Suno kay Puentevella, siya mismo ang nakakita nga mismo ang katapo sang City Agriculture Office kag City Veterinary Office ang nagasuksok na sang ila nga Personal Protective Equipment (PPE) sa paglubong sang mga nagkalamatay nga baboy bilang precautionary measures.
Nagapati man ini nga ang Liga president kag punong barangay sang Barangay Taculing ang hugot nga nagamonitor sa ila barangay kasunod sang kumpirmado nga kaso sang ASF.
Nagpanugyan man ini sa mga hog raisers sa ciudad nga ipahibalo gilayon sa barangay kun may yara sang mga nagkalamatay nga baboy agud nga mapaagi sa insakto nga proseso ang paglubong agud indi na maglaton ang kagaw kag likawan man ang pag-ihaw sang baboy nga patay na bangud delikado ini.
