Ginahimuan sang tikang sang International Solid Waste Integrated Management Specialists, Inc. (ISWIM) agud nga maseguro nga indi magcollapse kag may mahalitan sa mga basura nga ginahaboy sa sanitary landfill sa Barangay Felisa, Bacolod City.
Ini kasunod sang trahedya nga nagluntad sa sanitary landfill sang Cebu City kun sa diin tatlo na ang narecover nga bangkay kag may 34 pa nga ginapangita matapos nag-usmod ang nagabukid nga basura.
Sa interview sang Bombo Radyo Bacolod kay Councilor Homer Bais, chairperson sang Committee on Environment and Ecology sa Sangguniang Panlungsod, ginpresentar sang ISWIM sa ginpatigayon nila nga meeting upod sa mga Barangay officials ang indi mapuslan nga sitwasyon sang sanitary landfill nga ginbilin sang IPM Construction and Development Corporation.
Pahayag ni Bais nga indi kaangay sa Cebu City nga yara sa nabukid nga lugar ginhamtang ang sanitary landfill, sa Bacolod City ini ang nahamtang sa patag nga lugar.
Suno diri, nagsugata sa ISWIM ang wala maplastar nga mga basura, kag isa na lamang ka garbage truck ang maka-igo sa pagsulod.
Ini ang una nga ginhimos sang ISWIM kag sa karun, sarang na nga makasulod kag maka-ula sang dungan ang duha ka garbage trucks.
Dugang pa sini nga ginakutkutan ang duta agud magserbe nga dumping area kag kun ini ang mag-awas na, may-ara man sang natana nga limit sa height kag diameter sang basura.
Sa pag-ula sang basura, ini ang ginacompact kag ginatapan kag ginabutangan sang duta sa ibabaw agud indi madasig nga magcollapse, apang ini ang wala man ginahimo sang IPM.
Sa karun, naga-obra na sang Cell No. 5 ang Bacolod City agud may sunod nga matambakan sang basura bangod malapit na nga malab-ot sang Cell No. 4 ang limit.
Sa kontrata, ang ISWIM ang magamintenar sang sanitary landfill sa sulod sang isa ka tuig.
