Ginkompirmar sang Provincial Nurse Coordinator for Diabetes Control Program sang Negros Occidental nga nagapanubo ang edad sang mga tawo nga may diabetes.
Sa programa nga Doctor Bombo, ginpahayag ni April Joy Famaron nga indi pareho sang una nga mga katigulangan lang ang nagaka-apektuhan sang nasambit nga masakit, subong madamo na nga mga naga-edad 20 pasaka ang apektado.
Suno kay Famaron, ang mga tawo nga mahilig magkaon sang mga pagkaon nga matam-is, may mataas nga carbohydrates kag sugar contents kag ang mga may family history sang diabetes ang nagaangkon man sang nasambit nga masakit.
Ginklaro niya man nga indi mahambal base sa kadakuon sang lawas sang tawo kun ini ang may diabetes bangud makompirmar lang ini kun magpalaboratory sa dugo.
Suno sa iya, kun ang tawo masami ginagutom, palakaon kag permi nagapangihi, dako ang posibilidad nga ini ang may diabetes.
Gani, gapanugyan sang provincial nurse nga mag-exercise kag magkaon sang utan kag prutas.
Gina-ingganyo man sini ang mga ginikanan nga indi pagpaanaron ang ila mga kabataan sa matam-is nga pagkaon kag i-educate gid parte sa ila mga ginapangkaon.
Samtang, ginapanugyanan niya man ang mga pamatan-on nga mag-exercise kag magkaon sang maayo bangud suno sa iya, prevention is better than cure.
Gin-abisuhan niya man ang mga may diabetes nga magpadayon sa pagtumar sang ila maintenance kag bantayan gid ang ila nga ginakaon.
