BACOLOD CITY — Nagalaom ang Save the Sugar Industry Movement ukon SAVE SIM nga mangin sinsero ang Coca-Cola FEMSA Philippines sa pagtuman sang commitment sini nga magabakal na sang kalamay nga gina-produce sa Negros Occidental kag sa iban pa nga probinsya sa Pilipinas.
Ini ang pahayag ni SAVE SIM lead convenor Wennie Sancho kasunod sang ginsiling sang tiglawas sang Coca-Cola sa Congressional inquiry sang Mayo 16 nga gin-withdraw na ang kaso nga ila ginfile sa Regional Trial Court sa Quezon City nga nagapadeklarar nga null and void ang Sugar Order No.3 nga nagaregulate sang pagsulod sang high fructose corn syrup.
Suno kay Sancho, verbal pa lang ang pahayag sang kumbuyahan sang Martes kag wala pa sila sang papel nga gina-uyatan tuhoy sa withdrawal sang kaso.
Ini bangud nga sang nag-hearing ang Senado sang bulan sang Abril, ginpahayag man sang kumpaniya nga iga-withdraw nila ang kaso apang wala man gali gintuman.
Sa pihak sini, nagalaom si Sancho nga tumanon sang Coca-Cola ang ila pangako sa mga congressman nga magabakal na sang lokal nga kalamay.
