Masobra isa ka gatos ka mga pasahero ang stranded sa BREDCO Port halin kaina sang udto matapos ginpaidalom sa tropical cyclone wind signal number 1 ang northern portion sang Negros Occidental bangud sa Bagyo Dante kun sa diin automatic nga kanselado ang sea travel.
Alas-11:00 kaina sang udto, ginpaidalom sa signal number 1 ang San Carlos City, Salvador Benedicto, Cadiz City, Sagay City, Escalante City, Toboso, Calatrava, Talisay City, Silay City, EB Magalona, Victorias City, Manapla, Murcia kag Bacolod.
Suno kay Captain Ludovico Librilla, commander sang Coast Guard Station Negros Occidental, nagcoordinate sila sa shipping lines nga magkansel anay sang biyahe kasunod sang ginpagwa nga weather bulletin.
Nagpanugyan man si Librilla sa mga magagmay nga sakayang pandagat nga indi anay maglayag samtang may yara sang storom signal kag ginaabisuhan man sini ang substation sang Coast Guard Negros Occidental nga magcoordinate sa mga fisherfolks nga magpatigayon sang pahanumdom sa mga mangingisda.
Nagpanawagan man ini sa mga mangingisda nga indi anay magpalawod samtang may storm signal bangud para man ini sa ila seguridad.
Sa impormasyon nga ginpagwa sang PCG as of 3:25PM, 125 ka mga pasahero kag 11 ka rolling cargoes padulong sa Manila ang stranded sa BREDCO Port; 31 ka mga pasahero padulong sa Iloilo City; kag 22 ka mga pasahero kag 10 ka rolling cargoes padulong sa Dumangas ang stranded.
