Suspendido gihapon ang byahe sang barko sa pila ka pantalan sa Negros Occidental, apang kadam-an ang nagresume na.
Sa interview sang Bombo Radyo Bacolod kay Lt Junior Grade John Hoffer Olis, spokesperson sang Coast Guard Northern Negros Occidental, as of 11:00 am, ang Pulupandan port kag EB Magalona port na lamang kasubong man ang byahe sang fast craft sa BREDCO Port sa Bacolod City ang nagapabilin nga suspendido.
Padayun naman ang byahe sang Roll on Roll off (RoRo) vessels apang dutay ang numero sang mga nagsakay nga pasahero.
Balik naman ang port operations sa Escalante Port, San Carlos Port kag Cadiz Port.
Padayun pa nga ginaverify ang numero sang pasahero nga nagbyahe, samtang wala naman sang reported nga nastranded.
Suno kay Olis lauman pa ang pag-ulan sa probinsya gani padayun man ang ila monitoring kag pagkoordinar sa iban pa nga ahensya sang gobyerno kaangay sang Local Disaster Risk Reduction and Management Offices kag iban pa.
