BACOLOD CITY — Nagpangayo sang pasaylo si Defense Secretary Delfin Lorenzana kay Binalbagan Vice Mayor Samuel Gavaran sa gina-alegar pagkalakip sang ngalan sini sa listahan sang mga financier sang Maute terror group.
Ini ang ginkumpirmar sa Bombo Radyo Bacolod ni Major General Jon Aying, commander sang 3rd Infantry Division, Philippine Army.
Suno diri, mismo siya ang nag-verify sang nasambit nga impormasyon kay Sec. Lorenzana kag nahisayran nga kapareho lamang sang ngalan lamang sang bise alkalde ang yara sa listahan.
Ginklaro ni Sec. Lorenzana nga ang Samuel Gavaran nga yara sa listahan ang taga Northern Mindanao nga nag-convert sa Islam kag nalakip ini sa 200 nga kabahin sang Maute group nga ginpapanaugan sang arrest order number 2.
Dugang pa sini wala man nabutang sa arrest order nga Vice Mayor sang banwa sang Binalbagan ang ginatumod nga Gavaran.
Bangud sini suno kay Major General Aying, nagtext si Sec. Lorenzana kay Vice Mayor Gavaran kag nagpangayo sang pasaylo.
