Gintawag nga “bungol” sang secretary general sang General Alliance of Workers Association (GAWA) ang miembro sang Sangguniang Panglungsod kag ang mga Board of Directors sang Bacolod City Water District (BACIWA) bangud sa indi paghatag sang aksyon tuhoy sa joint venture sang Prime Water kag BACIWA.
Sa interview sang Bombo Radyo Bacolod kay Mr. Winnie Sancho, pila na ka beses sila nag-padala sang sulat sa Board of Directors sang BACIWA apang ini ang gina-pawalaan lang, kag may yara naman sang duha na ka public hearing nga gin-patigayon apang wala naman naga-kadto ang mga director magluwas lang sadtong una nga paghilibati nga gintambongan ni Board of Director Lorenz Villanueva.
Luyag lang man ni Sancho nga makahibalo sila sang gamay nga detalye tuhoy sa transaksyon sang Prime Water kag BACIWA sa diin nagapang-duha duha na ini nga madangat na sa “privatization” ang nasambit nga transaksyon.
Suno sa iya, kun i-privitize ang BACIWA, dako gid ang maigo sa mga konsumedor sa Value Added Tax nga 12% kag sa water rate increase.
