Ginpahayag sang negosyante nga kinahanglan nga mapakita nga kontrolado sang mga kapulisan ang peace and order sa Negros Occidental agud indi magduhaduha ang mga investors.
Ini kasunod sa pagluthang-patay sa isa ka negosyante sa tabok lamang sang Barangay Hall sa Barangay Estefania, Bacolod City kaina sang kaagahon.
Ang biktima ang ginkilala nga si Elson Cepeda, 49 anyos, nagapanag-iya sang bar kag nagaserbe nga bangka sa Small Town Lottery (STL) operation sa ciudad sang Bacolod.
Sa interview sang Bombo Radyo Bacolod kay Metro Bacolod Chamber of Commerce and Industry chief executive officer Frank Carbon, sa business point of view malinong man ang kahimtangan sa ciudad sang Bacolod kag probinsya sang Negros Occidental humalin Enero tubtob Abril.
Kun may-ara sang kriminalidad sa mga negosyante, ini ang makabig lamang nga isolated case kaangay sa pagpatay kay Cepeda.
Apang panawagan sang mga ini nga dapat madasig nga masolbar sang kapulisan ang krimen kag maghatag sang update sa media.
Pinaagi sini, mapakita nga kontrolado sang mga kapulisan ang peace and order, kag indi matahap ang mga investors nga magpasulod sang negosyo.
Nakaligad nga binulan, ang business sector ang nakighinun-anon na kay Bacolod City Police Office (BCPO) Director Police Col. Noel Aliño, kun sa diin ang MBCCI ang nag-offer nga sila na ang magahatag sang gasoline allowance kun ibalik ang Motor Cycle Anti-Street Crimes Operative (MASCO).
Dugang pa nila nga panawagan nga matumod ang mga crime prone areas, mabutangan sang suga kag CCTV camera.
Nagsugot man si Aliño apang sa karun sila ang wala pa sang update sa development sang request.
Sa pihak nga bahin, plano man sang kapulisan nga itrain ang mga Barangay Tanod agud magserbe nga extended forces kasubong man ang mga security guards sa mga establishimento nga magaserbe nga kaangay sa mga force multipliers.
