Magulang ni Ricky Sereño
Patay ang self-confessed bagman sang Berya Drug Group sa Negros Occidental matapos ginluthang sa ciudad sang Bacolod sini nga hapon.
Ang biktima nga si Ricky Serenio nga nag-ako sang una nga bagman sang ginapahayag drug lord nga si Berya Tolentino ang ginluthang samtang sakay ini sa iya awto sa Barangay Pahanocoy, Bacolod City takna alas-4:00 sang hapon.
Gindala pa sa Bacolod South General Hospital si Serenio apang ginbawian man sang kabuhi bangud sa igo sa ulo, tiyan, abaga kag iban pa nga bahin sang lawas sini.
Sa interview sang Bombo Radyo sa utod sini nga si To Amay Serenio, gikan sa Manville Royalle ang iya magulang kag papuli na kuntani sa Pulupandan sang ginbantayan ini sang mga suspetsado nga sakay sa motorsiklo samtang paguwa sa subdivision kag ginpaarakan tiro.
Tadtad sang bala ang driver’s seat bangud si Serenio mismo ang nagadala sang salakyan.
Ginapatihan nga .45 caliber pistol ang armas nga gingamit sang mga suspetsado.
Si Serenio ang naguwa sa publiko sang Enero 2016 agud ibuyagyag ang pangalan sang mga opisyal sang pulis nga nagabaton sang bulanan nga payola gikan sa iya nga boss nga si Berya Tolentino, kalakip na si anay Negros Occidental Police Provincial Office director William Señoron.
Gindalahig man sini sa illegal drug trade si anay Senator Mar Roxas, Senator Franklin Drilon kag former Iloilo City Mayor Jed Patrick Mabilog.
Humalin sang tuig 2016, nagsaylo na sa Pulupandan si Serenio bangud ginkustodiya ini ni former Pulupandan Mayor Magsie Peña.
Tuig 2017, ginpatay ang utod kag amay ni Serenio kag wala natumod ang suspetsado sa krimen.
