Ginalantaw sang political analyst nga wala sang pulos ang pagpatigayon sang Senate inquiry kag pagpatawag sang mga imbulbado may kaangtanan sa gina-alegar gentleman’s agreement sa tunga ni former President Rodrigo Duterte kag Chinese President Xi Jinping, bangod wala man sang criminal charges nga mahimo mapasaka.
Nahibaluan nga ginpahayag ni House Speaker Martin Romualdez nga ila ipatawag ang mga opisyales sang nakaligad nga administrasyon nga mahimo may ihibalo, lakip na ang mga una nga nagtuad kag nagpanginwala agud diskusyunan ang issue.
Ini bangod luyag sang Senado nga mahibaluan kun ano ang kamatuoran sa gina-alegar gentleman’s agreement.
Tinutuyo sang mga ini nga matul-id ang problema kag indi na masulit pa sa palaabuton.
Sa interview sang Bombo Radyo Bacolod kay Atty Jomax Ortiz, ginakwestyon sini kun ngaa sa pagpatigayon sang Senate inquiry ang mga anay opisyales lamang ang ginpatawag kag indi ang anay Presidente nga maathag nga amo ang nagpatigayon sang kasugtanan.
Gani ginalantaw sang political analyst nga ang tanan ang gini-os gi-os lamang sa politika, parehas sa iban nga lihok sang Senado kaangay sa paglagas kay Kingdom of Jesus Christ founder Pastor Apollo Quiboloy kag imbestigasyon sang International Criminal Court kay former President Rodrigo Duterte.
Nagapati ini nga ang mga sitwasyon ang may kaangtanan na sa nagahilapit nga US Presidential Election kasubong man 2025 Midterm Election diri sa Pilipinas.
Pahanumdom ni Ortiz nga wala sang bug-at ang gentleman’s agreement bangod ini ang personal lamang nga kasugtanan sang duha ka Presidente.
Dugang pa nga ini ang wala sang documentation gani sarang lamang mapanas ukon makalimtan kun iban na ang nagapamuno.
Bangod kaangay nga personal nga kasugtanan lamang sang duha ka mag-abyan, gani indi man ini subject sa criminal charges.
