BACOLOD CITY – Ginhangkat ni Senator Richard Gordon ang Amnesty International nga magpasaka sang kaso sa International Criminal Court (ICC) may angot sa extrajudicial killings sa Pilipinas.
Ini ang panghangkat ni Gordon kasunod sang panindugan sang AI nga may ebidensiya sila nga nauyatan nga may nagamandu sa Philippine National Police (PNP) nga magpamatay sang drug personalities kag nagasugo man sang iban agud himuon ang pagpamatay.
Sa interview sang Bombo Radyo ginpahayag sang senador nga kun matuod nga may mga pamatuod ang nasambit nga grupo nga may mataas nga opisyal nga nagamandu sa PNP, mas maayo nga ipasaka nila ini sa ICC.
Apang nagapati si Gordon nga wala sang nagakaigo nga ebidensiya ang AI rason nga lunsay publicity na lamang ang ginahimo sini paagi sa pagbuyagyag sang ila nga report.
Samtang, ginklaro ni Senator Gordon nga wala ini nagadampig kay Presidente Rodrigo Duterte bangud sarang pangapinan sang chief executive ang iya kaugalingon.
