Kumbinsido si Senator Risa Hontiveros nga may yara sang basehan agud magfile sang criminal kag administratibo nga kaso batok kay Bamban, Tarlac Mayor Alice Guo matapos ang executive session sang Senado kaupod ang nagkalain-lain nga ahensya sang gobyerno sang Miyerkules kun sa diin gindiskusyunan ang natuhoy sa confidential nga mga impormasyon natuhoy sa illegal Philippine Offshore Gaming Operators (POGOs) kag ang ila posible nga connection kay Guo.
Pila ka mga ahensya ang yara man sa ginpatigayon nga closed-door meeting kaupod ang Presidential Anti-Organized Crime Commission (PAOCC), National Security Council (NSC) kag Anti-Money Laundering Council (AMLC).
Suno diri, wala sang may nakabuhin ukon nakapanas sa opinion sang komite nga sigurado nga may kaangtanan ang alkalde sa POGO hub sa Bamban.
Suno kay Hontiveros, sa documentary evidence pa lamang kag iban nga mga inputs nagikan sa mga resource persons.
Kampante man ini nga mabug-at kag solido ang mga kaso nga ginfile kag sarang nga mafile pa sang nagkalain-lain nga mga ahensya sang executive sang gobyerno.
Ginmintinar man sang Senador nga wala sang makusog nga ebidensya nga nagapakita nga isa ka Filipino si Guo.
Wala gin-imbitar ang alkalde sa closed door meeting apang nagpasa ang iya abogado sang isa ka sulat sa opisina ni Hontiveros nga nagasabat sa mga alegasyon batok sa iya.
