Ginkumpirmar sang pinuno sang National Bureau of Investigation (NBI)-Bacolod nga indi lang sa ila ahensya informant ukon asset ang ginpatay sang grupo nga nagasakay sa pula nga SUV sa Purok Malalusan, Barangay 32, Bacolod City sang nagligad nga Miyerkules.
Madumduman nga nagatambay sa tyangge ang biktima nga si Ramie Cientos, 62-anyos kag residente sang amo nga barangay sang ginluthang ini.
Nahibaluan nga 16 tanan ka mga empty fired cartridges sang cal. 45 pistol ang narecover sa lugar.
Sa interview sang Bombo Radyo Bacaolod kay Atty. Renoir Baldovino, ginpahayag sini nga ila nangin informant sadto si Cientos apang bangud sa COVID-19 pandemic, nauntat ini halin sang nagligad nga tuig.
Gin-athag man ni Baldovino nga iya na ginrecall ang ID nga nakuha sa biktima bangud nga inactive na ini.
Dugang pa sang NBI Bacolod head nga magluwas sa NBI, informant man si Cientos sa iban nga mga law enforcement agency.
Ginatugyan naman sini ang imbestigasyon sa Philippine National Police bangud wala pa man sang request ang pamilya nga magpatigayon sila sang further investigation.
Samtang, wala pa nakakuha sang kopya sang CCTV footage nagikan sa tyangge ang kapulisan.
Suno kay P/Major Ramel Sarona, station commander sang Bacolod Police Station 1, ginpahayag sini nga wala ang tag-iya sang tyangge sang nagkadto didto ang imbestigador.
Nagpakig-angot naman sila sa barangay agud makakuha sang iban nga CCTV footage nga makabulig sa ila imbestigasyon.
Dugang pa ni Sarona nga indi na magpa-autopsy ang pamilya ni Cientos.
Pakadtuan man sini liwat ang pamilya bangud posible may impormasyon sila nga nga mahatag nga makabulig sa imbestigasyon.
