Patay ang isa ka senior citizen nga babayi nga nagatabok sa dalan matapos mabungguan sang salakyan sa Mabini National Highway, Barangay Zone 16, Talisay City.
Ang biktima ang ginkilala nga si Alyas Lorita, 71 anyos, babayi, balo kag residente sang Prk. Paghida-it, Brgy. Mambulac, Silay City samtang ang suspect ang ginkilala naman nga si Alyas Trixia, 27 anyos, babayi, residente sang L7-9 Buenavista Subdivision, Brgy. Guinhalaran, Silay City.
Suno sa Talisay City Police Station, ang aksidente ang nagluntad alas-6:40 sang gab-i kag nareport alas-7:50 sang gab-i.
Sa imbestigasyon, natumod nga si Trixia ang nagabyahe gikan sa Silay City padulong sa Bacolod City dala ang Toyota Fortuner sang aksidente sini nga nabungguan ang nagatabok nga senior citizen.
Gindala pa sang rescue team sang Talisay City Disaster Risk Reduction and Management Office ang biktima sa Corazon Locsin Montelibano Memorial Regional Hospital apang gindeklarar nga Dead on Arrival.
Sa karun, nakahunong na ang driver sa Talisay City Police Station.
