Wala na sang kabuhi sang masapwan ang isa ka 62 anyos nga mangingisda nga ginapatihan naigo sang kilat samtang nagapanagat sa bahin sang Barangay Bulanon, Sagay City, Negros Occidental.
Sa impormasyon nga natipon sang Bombo Radyo Bacolod, alas-10:00 ang takna sang aga kahapon sang makabatun sang report ang Sagay City Police Station nahanungod sa bangkay sang mangingisda nga nasapwan sa sulod sang iya mismo nga sakayan.
Ang biktima ang ginkilala kay Ernesto Baynas alyas Amang, residente sa Sitio Datag, Barangay Bulanon, Sagay City.
Santo sa pahayag sang mangingisda nga nakakita sa biktima, ginalantaw sini nga nagluntad ang insidente alas-7:00 sang aga samtang nagapanagat ang biktima.
Gilayon man nga ginreport sang mananagat sa kapulisan sang iya nga masapwan ang bangkay.
Nakita ang paso sa pila ka bahin sang lawas sang biktima nga ginapatihan tuga sang pag-igo sang kilat, samtang may nakita man nga sunog sa bahin sang sakayan sini.
Apisar sini, magapatigayon gihapon sang post mortem examination ang mga kapulisan sa bangkay ni Baynas
