Indi na kinahanglan nga mag-presentar ang mga senior citizens sang purchase booklets para nga maka-avail sang 20 percent discount sa mga bulong kag sa medical services.
Ini ang kasunod sa gin-isyu ni Department of Health (DOH) Secretary Teodoro “Ted” Herbosa nga Administrative Order No. 2024-0017 nga naga-amyensar sang duha ka nauna nga administrative orders nga amo ang nagaplastar sang guidelines sa pag-implementar sang Republic Act No. 9994 ukon “Expanded Senior Citizen Act of 2010.”
Sa latest order, ginkakas na ang provision kun sa diin gina-require ang mga senior citizens sa pagdala sang purchase booklets kun magbakal sila sang prescription medicines, over the counter medicines, kag kun mag-avail sang medical devices.
Tinutuyo sini nga mas mapahapos ang pagbakal para sa ila.
Sang Pebrero, matandaan nga nagpanawagan ang National Commission of Senior Citizens (NCSC) sa business owners nga mangin digital na sa monitoring sa transactions sang senior citizens pananglitan makakas na gid man ang purchase booklets bilang requirement sa pag-avail sang government-mandated discounts.
