BACOLOD CITY — Preparado kag handa na ang senior league sang Negros Occidental Philippines nga ihatag ang tanan agud makuha ang kampyunato sa Asia-Pacific Softball Tournament sa Singapore.
Ini ang pasalig sang head coach sang senior league sang Negros Occidental Philippines Tony Oquindo sa ila pagsabak sa tournament sa Singapore sa Hunyo 15 tubtb 20.
Suno kay Oquindo tuman ang nangin preparasyon sang team kag 95 porciento na nga preparado.
Magluwas sa training nga gina hiwat sa Domingo Lacson National High School nakigbahin sa Negros First Gov. Alfredo Marañon Inter Hacienda Softball League ang senior league team bilang kabahin sang ila preparasyon sa tournament kun sa diin lunsay mga lalaki ang ila mga kontra nga gina lakipan sang duha ka teams gikan sa ciudad sang Cadiz kag 9 naman ka teams gikan sa banwa sang Manapla.
Sini nga Sabado hiwaton ang championship sang inter hacienda softball league sa banwa sang Manapla.
Hunyo 14 magabiya ang team sa Pilipinas padulong na sa Singapore kag ila mangin kasumpong sa tournament ang pungsod Indonesia, India kag Singapore.
Ang mangin kampyon sa sini nga tournament ang mangin representante sang Asia-Pacific sa world series nga hiwaton naman sa estado sang Delaware sa Amerika sa bulan sang Agosto.
