BACOLOD CITY — Ginahulat na sang Police Regional Office (PRO) 18 kun sin-o ang pilion ni Governor Alfredo Marañon Jr. nga mangin director sang Negros Occidental Police Provincial Office (NOCPPO).
Ini matapos ginkumpirmar ni (PRO) 18 spokesperson Senior Inspector Armelyn Vargas nga nagpadala na ang Kampo Crame sang nominees sa gobernador.
Nalakip sa tatlo ka mga nominees sanday Senior Supt. Rodolfo Castil, ang officer in-charge karun sang NOCPPO; Senior Supt. Moises Villaceran, Police Community Relations Division chief sang PRO-18; kag Senior Supt. Romeo Mangwag, chief of operations sang PRO-18.
Apang suno kay Vargas kun wala sang mapilian si Gov. Marañon gikan sa tatlo, mahimo ini magpadala sang komunikasyon sa national headquarters kag diri mahimo niya ilakip ang nahamut-an nga mangin NOCPPO director.
Kun wala man ini sang kaugalingon nga nominees, padal-an naman siya sang bag-o nga listahan sang mga nominado.