Agud punggan ang ginapatigayon nga misa sa San Isidro Labrador Parish Church, sa Don Pedro Yulo, Barangay Sto. Rosario, Binalbagan, Negros Occidental, ginpasulod sang isa ka lalaki sa simbahan ang ginadala sini nga tricycle.
Ang insidente ang nagluntad alas 7:15 subong nga aga samtang nagamisa si Fr. Leopoldo Cahilig.
Ang suspetsado ang ginkilala nga si Rolly Semira, 39 anyos, kasado kag residente sa nasambitan nga Barangay.
Nagkalaguba ang mga benches matapos gin-arado sang tricycle kag ginpangguba man ni Semira ang rebulto sa simbahan.
Sa interview sang Bombo Radyo Bacolod kay Semira, siya ang nagabyahe sang tricycle kag nagasidelines man kun kaisa sa construction.
Gin-ako man sini nga madugay na niya ini nga luyag himuon kag karun lamang nadayun.
Pahayag sini nga siya ang Islam kag ginsugo ni Allah nga gub-on ang mga rebulto bangod ini ang wala nagapati sa mga diyos-diyosan.
Aminado man ini nga siya ang nagagamit sadto sang illegal nga droga, apang nag-untat na.
Samtang gilayon man nga nagpagwa sang statement si Binalbagan Mayor Alejandro Mirasol tuhoy sa insidente.
Nahibaluan nga ang simbahan ang nahamtang sa atubang lamang sang Binalbagan Municipal Hall.
Pahayag sang alkalde nga siya ang nagakasubo sa natabo, apang ginapasalig sini sa simbahan, mga kaparian kag personnel sa simbahan, kasubong man sa mga sumilimba nga indi na maliwat ang kaangay nga insidente.
Ginakondenar man sini ang ginhimo sang suspetsado nga ginkilala nga si Rolly Semira.
Pasalig man ni Mirasol nga suportahan sang local government unit ang renovations nga kinahanglan sang simbahan.
Pahanumdom sini nga apisar naguba ang mga sagrado nga rebulto, indi naman maguba ang pagtuo sang tawo.
Sa interview sang Bombo Radyo Bacolod sa alkalde, denekada na ang mga rebulto nga ginpangguba sang suspetsado gani bisan sila ang makabakal, indi na maislan ang sentimental value nga dala sang mga ini.
