Sa tion nga mapasar ang Bayanihan to Arise as One Act ukon Bayanihan 3 nga magahatag sang P2,000 nga ayuda sa tagsa ka Pilipino, bisan lapsag ang makabaton sang financial assistance.
Sa interview sang Bombo Radyo kay Bacolod City Lone District Congressman Greg Gasataya, vice chairperson sang House committee on appropriations, ang tanan nga Pilipino ang makabaton sang P2,000 basta buhi ini kag nakatinir sa Pilipinas sa sulod sang anom ka bulan para sa overseas Filipino workers.
Bisan lapsag suno kay Gasataya ang nalakip sa isip sa mga makabaton, basta narehistro ini sa Office of the Civil Registrar.
Pananglitan mapasar bilang layi, ang una nga tranche nga P1,000 ang igahatag isa ka bulan halin sa effectivity sang layi, samtang ang second tranche ang igahatag makaligad ang tatlo ka bulan.
Aminado si Gasataya nga indi mahatag sang tingob ang ayuda bangud sa availability sang pondo kag madamo man ang alokasyon nga nasulod sa layi.
Kun maaprubahan ang layi, magadihon sang implementing rules and regulations kag igapatuman ini sang Department of Social Welfare and Development bilang implementing agency.
Magapakig-angot naman ang DSWD sa local government unit nga magabulig sa paghatag sang kinahanglanon nga data kag pagrelease sang ayuda.
May ginaduso sa karon sa Kamara nga hatagan nalang sang P10,000 ang isa ka pamilya, apang mahibaluan ang final nga kantidad sa deliberasyon kag binotohay sang mga kongresista.
Sa tion nga indi pareho ang version sang Kamara kag sang Senado suno kay Gasataya, magasapol ang bicameral conference committee agud ireconcile ang duha ka version sang hagna.
Plantsahon sa deliberasyon sang Kamara kun pila ang final nga pondo nga italana sang Bayanihan to Arise as One Act ukon Bayanihan 3.
Suno kay Gasataya, subject pa sa availability sang pondo nga icertify sang Bureau of Treasury ang final nga kantidad nga italana sang Bayanihan 3.
Ginpahayag ni Finance Secretary Carlos Dominguez nga ang pondo ang pagakuhaon sa 2020 national budget kag dugang nga dividend remittances nagikan sa govermment-owned and controlled corporations.
Ang BOT ang magaissue naman sang certification sang availability sang pondo apang magacertify lamang ang mga ini kun may yara sang excess revenues ukon may yara sang bag-o nga revenue sources.
Ang P405.6 billion nga Bayanihan 3 ang natunga sa tatlo ka phase.
Ang Phase 1 ang nagabalor sang P167 billion; ang Phase 2 ang nagabalor sang P196 billion kag ang Phase 3 ang nagabalor sang P43.6 billion.
Suno kay Gasataya, may yara sang posibilidad nga mahulam ang national government sa lending institutions apang paborable man ini bangud makadto man sa mga Pilipino.
