Nagdepensa ang purok president sang Purok KBS, Barangay Sum-ag, Bacolod City may kaangtanan sa alegasyon nga ginbuhinan sang duha ka libo ang P6, 000 nga financial assistance nga ginbaton sang mga pumuluyo agud nga ipanghatag sa iban nga pamilya.
Suno kay Mariliz Ortaliz, wala sang kamatuoran ang nasambit nga reklamo bangud boluntaryo ang pagpangayo sini sang sharing nagikan sa mga nakabaton sang benepisyo.
Suno diri, 258 ang kabug-usan nga household sa Purok KBS kag 55 diri ang nakabaton.
Bangud sa kadamu sang kulang, ginpakamaayo sini nga himuon ang programa nga pagdonar para mahataga ang iban nga mga nagakinahanglan kag nakig-angot man ini sa punong barangay antes ginpatigayon ang proyekto.
Wala naman ini nangayo sang P2,000 gikan sa mga social amelioration beneficiaries kundi kun pila lang ang yara sa kabubut-on nga ihatag.
May ara suno sa iya sang nagdonar sang P500, P1,000 kag may yara man nga P1,500 kag gindugangan nalang sini tubtob nga makalab-ot sa P30,000.
Suno pa diri, 30 sa mga benepisyaryo ang nag-ugyon kag nagdonar para sa programa.
Ginklaro man sini nga wala pilitay sa pagdonar sa amo nga programa.
Ginsiguro man ni Ortaliz nga documented ang programa pinaagi sa pagpapirma sa mga nagdonar kag nahatagan.
Ginklaro man sini nga apisar ang iban sa nahatagan amo ang anay engineer, apang tigulang naman ini kag indi na sarang magtrabaho.
Nagapati naman si Ortaliz nga ang nagreklamo amo ang nagahingabot lamang sa iya.
Naghatag man ini sang mensahe sa tagreklamo nga atubangon siya sini agud nga mas maklaruhan ang problema.
Suno diri, may nagpalapit sa iya nga nagahilibion bangod nga wala na sang makaon, rason kun ngaa ginhemuan sini sang paagi pinaagi sa programa.
