Ginpatpat sa ginpatigayon nga pagsinapol sang Regional Development Council Region 6 ang pila ka mga problema kag solusyon sa tion nga matukod na liwat ang Negros Island Region.
Suno kay Bacolod City Mayor Alfredo ‘Albee’ Benitez nga amo man ang chairman sang Regional Development Council Region 6, ginahulat na gid lamang ang perma ni president Ferdinand ‘BongBong’ Marcos Jr, para mangin layi ang NIR Bill.
Suno diri, sa ginpatigayon nga consultative meeting kaupod ang mga congressman, mayors kag regional directors, isa sa isyu nga ginhatagan sang pagtamod amo ang kakulangan sa mga empleyado para sa igatukod nga regional offices para sa NIR.
Ginalantaw man nga indi madali-dali nga butangan sang regional director ukon mga empelyado ang bag-o nga regional offices kag isa sa nangin suhestyon amo nga magabutang ang national agency sang acting regional director kag empleyado.
Isa pa gid sa nangin isyu amo ang budget, kag ginsuhestyon para diri amo ang pagkuha sang budget gikan sa mga regional offices samtang gina amat-amat pa lamang ang pagtukod sang NIR kag sa posible nga sa masunod nga tuig madala na ini sa budget.
Apang, ginapatihan naman nga mangin mahapos lamang ini kasunod nga natukod man ang NIR sadtong tuig 2017.
Suno kay Benitez, lauman naman sa masunod nga bulan ang pagpatigayon man sang consultative meeting kaupod naman ang probinsya sang Negros Oriental kasubong man ang probinsya sang Siquijor.
