Ginpahayag sang secretary-general sang Alliance of Concerned Teachers sa ciudad sang Bacolod nga may kinamatarong ang tiglawas sang grupo sang manunudlo kun ano ang suksukon sini sa pagtambong sa State of the Nation Address (SONA) sang presidente.
Sa interview sang Bombo Radyo Bacolod kay Grace Abellar, may yara sang kinamatarong ang isa ka tawo kun ano ang pagasuksukon sini sa isa ka event kaangay lamang ni ACT Representative France Castro.
Una na nga ginpahayag ni Castro nga magasuksok ini sang Filipiniana nga nagarepresentar sang mga magagmay nga sektor sa sosyodad.
Suno pa diri, ang eskwelahan ang nagarepresentar man indi lamang sa mga estudyante kundi sa mga mangunguma, mangingisda kag iban pa nga sektor sa sosyodad.
Dugang pa sini nga sa eskwelahan ginadevelop ang creative thinking kag ginapabutyag ini paagi sa art, gani nagapati ini nga valid ang pagpili ni Castro sang luyag sini nga suksukon.
