Panawagan sang national chairperson sang Student Council Alliance of the Philippines kay Senator Juan Edgardo ‘Sonny’ Angara sa pagpungko nga Education Secretary nga unahon ang mga core issues sang mga estudyante, manunudlo kag ginikanan.
Sa interview sang Bombo Radyo Bacolod kay Ken Paolo Gilo, madamo sang problema sa sektor sang edukasyon kalakip na ang tuman ka nubo nga score sang Pilipinas sa International assessment.
Dugang pa sini nga nakita sa pagtuon nga 90 porsyento sang mga 10 anyos ukon Grade 4 students ang nabudlayan gihapon sa pagbasa kag pagsulat.
Suno kay Gilo, 159,000 classrooms pa ang kulang sa Pilipinas nga kinahanglan mapun-an.
Ginakasubo sini nga ang polisa sang Department of Education (DepEd) sa pagpamuno ni Vice President Sara Duterte ang nagfocus sa lain nga mga aspeto kaangay sang confidential funds kag pagduso sang mandatory Reserve Officers’ Training Corps (ROTC).
Karun nga si Angara na ang magapungko bilang DepEd Secretary, panawagan sang mga ini nga ma-allign ang mga polisa kag programa sang ahensya sa kun ano ang matuod nga issue sang mga estudyante, manunudlo kag mga ginikanan sang estudyante.
Aminado si Gilo nga apisar mataas ang educational background kag may maayo nga track record sa Senado kun sa diin kilala nga nagabulig sa education sector si Angara, ini ang wala nagakahulugan nga siya ang may ikasarang na sa maayo nga pagpamuno sa ahensya.// Paathag sini nga ila pa lantawon ang performance sini samtang sila ang padayun man nga magalobby sang reporma sa sektor sang Edukasyon.
