BACOLOD CITY — Emosyonal ang misis sang suldado nga taga-banwa sang Cauayan sa probinsya sang Negros Occidental samtang ginasaysay sa Bombo Radyo ang kamatayon sang iya bana sa sulod mismo sang war zone sa Marawi City.
Si Corporal Ariel Arquio sang Barangay Inayauan, Cauayan ang miyembro sang 63rd Infantry Battalion sang Philippine Army kag napatay sang Biyernes, Hulyo 28 samtang nagapakig-away batok sa mga miyembro sang Maute terror group kag iban pa gid nga terorista.
Sa exclusive interview sang Bombo Radyo kay Mrs. Ma. Fe Arquio, ginsaysay sini nga nakatawag pa ang iya bana antes ini ginbawian sang hulam nga kabuhi.
Biyernes sang gab-i sang naglisensya ang iya bana nga matulog apang natingala ini nga sungaw na ang iya tingog.
Nakamitlang man ini sang tatlo ka tinaga nga indi niya maintindihan antes nautod ang tawag kag indi na macontact ang suldado.
Sang amo nga tion, wala pa nakumpirmar ni Mrs. Arquio nga patay na ang iya bana apang indi na matawgan ang iya cellphone.
Samtang nagatulog ini sang Lunes, hinali lang siya nga nakabugtaw bangud gintawag sang iya bana ang iya pangalan.
Sang Martes sang aga, nagtawag ang kaupod nga suldado sang iya bana kag ginbalita nga napatay na si Corporal Arquio matapos nga naigo sang bala gikan sa kontra sang gobyerno.
Gindala pa kuntani ini sa ospital apang wala na nakalab-ot nga buhi.
Sang Biyernes sang gab-i, nabatyagan na ni Mrs. Arquio nga napatay ang iya bana bangud nahulog ang class picture sini nga nagasab-it sa dingding.
Samtang, nahisayran man nga makapila na gid man ka beses nga nagpamilin-bilin si Corporal Arquio sa iya misis antes ini napatay sa giyera sa Marawi City.
Sa interview sang Bombo Radyo kay Arquio, ginpahayag sini nga na-assign sa Julu, Sulu ang suldado apang sang Hulyo 10, gin-assign ini sa Marawi.
Ginpunggan pa niya ini kag ginhambalan nga ma-AWOL nalang apang indi makapauli ang iya bana nga indi makalisensya bangud balabagan man sila gihapon pag-abot sa pantalan sa Zamboanga.
Bulan sang Marso subong nga tuig ang ulihi nila nga pag-updanay sang suldado matapos nga nagpauli ini para sa kaadlawan sang iya asawa.
Apang antes ini nagbalik sa Julu, Sulu, nagbilin na ini kay Mrs. Arquio nga mahimo ini na ang ulihi niya nga pagpauli nga buhi bangud masami siya nagasabak sa giyera.
Panugyan sang suldado, batunon sang iya asawa sang hugot ang iya bangkay kag ipalubong sang matarong.
Agusto 2, nag-abot sa banwa sang Cauayan ang bangkay ni Corporal Arquio kag ini ang natalana nga igalubong sa masunod nga semana.
Indi makahibalo ang tiayon sini kun paano magpadayon sa ila pagpangabuhi apang ginahimo nalang sini nga inspirasyon ang duha ka mga kabataan nga naga-edad sang walo kag anom ka tuig.
Suno kay Mrs. Arquio, ginhakos sang iya subang nga bata ang litrato sang iya amay sang nahibaluan nga patay na ini.
