Nag-file sang supplemental complaint affidavit ang special panel of investigators sang Office of the Ombudsman batok kay anay House Speaker Martin Romualdez, anay Ako Bicol Representative Zaldy Co, kag iban pa para sa preliminary investigation angot sa flood control scandal.
Suno sa Ombudsman panel, ginaalegar nagkunsabohay sanday Romualdez kag Co agud makatipon sang P56 billion ill-gotten wealth humalin sang 2022 tubtob 2025 paagi sa diversion kag misuse of public funds kasubong man sang pagbaton sang undue financial benefits naggikan sa mga transaksyon sang gobyerno.
Sila ang mangatubang sa mga alegasyon kalakip ang plunder, graft, kag direct bribery.
Ginrekomendar man sang panel ang pag-file sang money laundering kag indirect bribery charges batok kay Romualdez.
Suno sa mga imbestigador, may mga panibag-o nga ebidensya nga nagasuporta sa mga alegasyon natuhoy sa pagdul-ong sang dalagko nga balor sang kwarta kay Romualdez, nga gina-alegar naggikan sa mga “commitments” sa government projects.
Ginpanginwala ini tanan ni Romualdez kag ginpahayag nga paga-atubangon sini ang kaso paagi sa due process.
Samtang, si Zaldy Co naman ang yara gihapon sa iban nga pungsod samtang nagapadayon ang mga legal nga tikang batok sa iya.
