Supisyente ang supply sang gatong sa mga fuel stations sa ciudad sang Bacolod nga ginbisitahan sang fuel monitoring team.
Sa interview kay Secretary to the Mayor Atty. Marty Go, may yara sang duha ka team nga nagpatigayon sang inspection kun sa diin ang tagsa ka team ang naglibot sa lima ka gas stations.
Santo sa resulta sang monitoring, supisyente ang supply sang gatong sa tanan nga fuel stations kag ang tanan nga presyo ang nagasunod sa price range nga ginhatag sang Department of Energy.
Ginpahayag man nga wala sang narecord nga nagahoard sang fuel.
Suno diri, wala nagakahulogan nga nagahoard na ang mga nagabakal sang madamo nga gatong kaangay sang nagadala sang gallon, container ukon drum.
Ang nagabakal gamit ang dalagko nga containers ang dapat magpakita sang proof sang ila operational requirement kaangay sang purchase order kag business permit agud nga masiguro nga lehitimo ang pagbakal.
May isa naman ka fuel station nga wala na-inspect bangud wala ang manager.
Santo sa pagsulundan dapat nga present ang manager sa tion sang inspection.
Samtang ang mga magapamalibad sa inspection ang ibutang sa record kag i-forward sa DOE, kag ang ahensya na ang makahibalo sa pagpatuman sang sanctions.
