Gikumpirmar ni Provincial Veterinarian Dr. Renante Decena nga kulang ang suplay sang itlog sa Negros Occidental.
Sa interview sang Bombo Radyo Bacolod kay Decena, ginpahayag sini nga nagakinahanglan ang probinsya sang 600,000 ka itlog sa kada adlaw bilang kunsumo kun sa diin 6kg ukon 72 ka itlog kada tawo ang per capita consumption.
Bangud nga 400,000 ka itlog lang ang maproduce sang mga backyard layers, nagakinahanglan nga magkuha sang suplay sang itlog ang probinsya nagikan sa Panay Island kag Bantayan Island.
Gin-athag naman ni Decena nga bangud may yara sang backyard production sa probinsya, nagalain-lain ang presyo sang itlog kada semana.
Dugang pa sini nga bangud sa malain man tiempo, diutay lang ang ginakaon sang mga layers gani nga gamay man nga itlog ang ila nagaka-produce.
Nahibaluan nga kun gamay ang suplay kag mataas ang demand, nagamahal ang bili sang mga balaklon.
Ginkumpirmar man sang provincial veterinarian nga humalin sang nagtuhaw ang COVID pandemic, nagsaka sang P1.50 tubtob P2 ang presyo sang itlog.
Sa Bacolod suno kay Decena, nagahamboy sa P8.50 ang presyo sang extra large nga itlog, P8 ang large, P7.50 ang medium kag P7 naman ang small size nga itlog.
