Ginpahayag sang Philippine National Police nga nagfile ini sang mga kaso batok sa supporters ni Kingdom of Jesus Christ (KOJC) leader Apollo Quiboloy samtang ang kampo naman sang nasambit nga televangelist ang nagaplano man nga magpasaka sang kaso batok sa pwersa sang kapulisan.
Ang ginalantaw nga legal battle sa tunga sang duha ka partido ang nagsugod sang nagpatigayon sang operasyon ang PNP sang Lunes agud magserbe sang warrant of arrest kay Quiboloy sa iya compound sa Davao City.
Masobra 100 ka mga pulis nagikan Criminal Investigation and Detection Group, Special Action Force kag iban pa nga PNP units ang nagpadulong sa mga propedad ni Quiboloy lakip na ang KOJC compound sa Buhangin, Davao City kag sa Prayer and Glory Mountains sa Barangay Tamayong sang Lunes sang kaagahon.
Suno kay PNP spokesperson Col. Jean Fajardo, anum ka mga supporters ni Quiboloy nga nagpartisipar sang demonstrasyon sa Glory Mountain ang ginpasakaan sang obstruction of justice, disobedience to agents of persons in authority kag posession sang bladed weapons.
Samtang, ginpahayag naman ni former President Rodrigo Duterte, nga amu ang nagarepresentar sa KOJC, nga sila ang magahimo sang legal action batok sa law enforcement agencies nga imbolbado sa iya gintawag “overkill” nga pagserbe sang warrants.
