Pomal na nga ginpasakaan sang kaso ang suspetsado nga naghimulos, nagpatay kag naghaboy sa pito ka tuig nga bata nga babayi sa basurahan sa Villa Miranda, Barangay 6A, Victorias City, Negros Occidental sadtong Domingo.
Sa interview sang Bombo Radyo Bacolod kay Police Captain Joy Ellaga, deputy chief sang Victorias City Police Station, kaso nga rape with homicide ang ginpasaka batok kay Mark Besa.
Ang kaso ginpasaka sa Victorias City Prosecutor’s Office antes maglapse ang reglementary period of detention ni Besa alas-12:00 kaina sang udto.
Agud malikawan ang kinagamo kag pagbutang sa kabuhi ni Besa sa peligro, nangin hugot ang seguridad nga ginpatuman sang Victorias City Police Station halin sa police station padulong sa prosecutor’s office bangud tuman kadamo ang nagbantay nga mga residente nga kalabanan kalalakihan nga mahimo magsakit sa suspetsado.
Nagserbe nga saksi sa krimen nga nagsubscribe sang affidavit ang misis kag kabataan ni Besa, kalakip na ang pila ka residente sa lugar.
Suno kay Ellaga, gin-ako ni Besa ang krimen kag ginpanginwala sini nga may yara sang kaangtanan si Jeffrey Belorio nga una na ginkustodiya sang mga pulis.
Suno kay Besa, magkaupod lang sila ni Belorio nga naggamit sang iligal nga druga sang Domingo sang aga apang wala ini nagtandog sa biktima nga si Janelle Mae Didal.
Suno kay Ellaga, wala man sang direkta nga nagtudlo kay Belorio nga ginhimuslan sini si Didal.
Bangud sini, ginhilway kaina sang udto si Belorio.
