Nadugang sang isa pa ang suspetsado sa pagluthang patay sa bangkador sa piryahan sa Barangay Guimbalaon, Silay City kahapon sang kaagahon.
Madumduman nga ang prime suspect nga si Pedrito Penafiel sang Hacienda Dolores sa nasambitan nga Barangay ang nagapangayo-kayo sa mga stall sang piryahan kag nagapamahog pinaagi sa ginasukbit sini nga armas-luthang.
Tubtob nga ini ang nangayo kay Julius Nibrea sang P500 apang bangod wala pa sang kita, nagtanyag lamang sang P200.
Bangod wala nahatag ang gusto, gintayaan sini kag ginluthang si Nibrea apang ini ang ginpaduko sang abyan sang suspect.
Ang abyan sang suspect ang naigo sang bala sa abaga, samtang naglapos naman ang bala kag nag-igo sa mata sang pakaisa sini nga si Allan Tamparong, 34 anyos, residente sang Barangay Payao, Binalbagan, samtang may isa pa ka nasalabat sang bala.
Sa interview sang Bombo Radyo Bacolod kay Police Lt Col. Mark Anthony Darroca, hepe sa Silay City Police Station, sa ila imbestigasyon may-ara sang isa pa ka kaupod si Penafiel sa pagpangluthang nga residente man sa Barangay.
Nahibaluan nga yara sa pito tubtob siyam ka lupok ang nabatian sang mga residente, samtang anom naman ka fired cartridges ang narecover sang kapulisan.
Ginpahayag man ni Nibrea nga sang siya ang wala maigo, ginlagas pa ini sang suspetsado apang bangod ini ang nakapalayo na ginbalikan ang iya pakaisa kag liwat nga ginluthang sang makapila ka beses.
Suno kay Darroca, tinguhaan nila nga mafile ang kaso nga murder batok sa duha ka suspetsado subong nga hapon ukon bwas sa aga.
