Nagapati ang Bacolod Police Station 8 nga drug-related ang pagpatay sa 54-anyos nga si Adonis Matulac sa Lacson Extension, Barangay Singcang Airport kagab-i kag natumod naman ang nagpatay sa biktima.
Sa interview sang Bombo Radyo kay Police Major Joery Puerto, station commander sang Bacolod Police Station 8, may nakakita sa suspetsado nga nagasakay sa puti nga Ford Ranger nga amo ang nagpaypay kag nag-istorya kay Matulac samtang yara ini sa motorsiklo tubtub nga iya ini nga gintiro sa agtang sang makaisa ka beses.
Ang suspetsado ang nagasakay sa passenger seat sang pick up kag wala na nagpanaog sa salakyan kundi naggawa lang ini sa bintana.
Santo sa panaysayon sang mga biktima, nakumpirmar sang Bacolod Police Station 8 nga ang nagpatay kay Matulac amo ang subject sang buybust operation sa Purok Hollow Blocks kahapon sang udto apang ini ang nakapalagyo antes naconsummate ang operasyon.
Suno kay Puerto, si Matulac ang nagakuha sang drug supply sa suspetsado apang masami nga kulang ang bayad sini gani mahimo nga nagpati ini nga si Matulac ang nanugid sa mga otoridad gani napatigayon ang buybust.
Sa karon, ginapangita pa ang wala ginhingadlan nga suspetsado nga pasakaan sang kaso nga murder samtang maulamid man sa kaso ang driver sang pick up kun matumod ang iya identity.
Nagapati naman si Puerto nga ari pa diri sa Bacolod ang suspetsado.
