Nadakpan na ang suspetsado sa pagpatay kay Mike Lumawag, empleyado sa land tax division sang Talisay City Treasurer’s Office sang Marso 5.
Ang suspetsado ang ginkilala nga si Jimpaul Elizalde alias Jimmy Elizalde ukon Muslim, 54 anyos, kasado residente sa Barangay Zone 2, Pulupanda, Negros Occidental.
Madumduman nga si Lumawag ang ginluthang sang ini ang magpanaog gikan sa iya salakyan kun sa diin nahimo pa sini magsulod sa ila balay, apang ini ang ginsulod sang suspetsado kag ginseguro nga mapatay.
Sa interview sang Bombo Radyo Bacolod kay Police Lt. Col. Salvador Trono, hepe sang Talisay City Police Station, may-ara sang eyewitness sa natabo nga krimen kag ini ang nakatumod sa identity sang suspect.
Si Elizalde ang ginserbihan sang warrant of arrest sa iya mismo nga puluy-an sa banwa sang Pulupandan kun sa diin ini ang nakuhaan sang isa ka hand grenade, cal. 9mm pistol, duha ka magazine sang cal. 9mm kag 20 ka live ammunition.
Suno kay Trono, ang Talisay City Police Station ang magapasaka sang kaso nga murder sa suspect, samtang ini ang pasakaan man sang Pulupandan Municipal Police Station sang kaso sa paglapas sa Republic Act 10591 ukon Comprehensive Firearms and Ammunition Regulation Act.
Sa karun wala pa matumod kun ano ang rasun sa pagpangluthang apang ginalantaw ang posibilidad nga si Elizalde ang miyembro sang gun for hire.
Sa pihak nga bahin, ginapahayag man nga anay empleyado sa Talisay City Government ang suspect.
Sa backtracking sang kapulisan, natukiban nga si Elizalde ang may anay kaso man nga two counts of murder sa Mindanao.
