Gilayon nga nadakpan ang duha ka mga suspetsado nga nagpang-ambush sa self-confessed bagman nga si Ricky Serenio sa Barangay Pahanocoy, Bacolod City kaina sang hapon.
Sa impormasyon nga nakuha sang Bombo Radyo Bacolod, ginkilala ang mga suspetsado nga sanday Allan Bustamante, 30-anyos kag residente sang Mabuhay 2, Toboso kag Joemar Dumip-ig, 30-anyos sang Prk. Boulevard, Barangay 14, Bacolod City apang ginapahayag nga tumandok sang Escalante City.
Lunsay naka-confine ang mga ini sa karon sa ospital sa Bacolod matapos makaangkon sang igo sa tiil.
Santo sa inisyal nga imbestigasyon, matapos ginpaarakan sang tiro ang salakyan ni Serenio, nagpalagyo sanday Bustamante kag Dumip-ig apang nation naman nga naglabay ang kapulisan kag ila ini nga ginlagas bangud nakita sang mga ini nga may dala nga armas ang duha.
Nagtuga man sang vehicular accident ang paglagsanay sang mga ini kun sa diin may nagkalatumba nga mga salakyan kag motor.
Ginapahayag nga nasalabat man ang isa ka bata nga naga-angkas sa motorsiklo nga ginadala sang iya amay kun sa diin nadaplisan ini siya sang bala.
Suno kay Bacolod City Police Office spokesperson Lt. Col. Ariel Pico, padayon pa sa karon ang ila imbestigasyon sa insidente kag ila pa ginahibalo ang background sang mga suspetsado.
