Liwat nga ginreklamo sang tag-iya sang isa ka funeral parlor ang pagpadecline sang Moises Padilla Municipal Government sa pagprocess sang ila business permit.
Sang tuig 2025, ginpamatbatan nga guilty si Mayor Ella Garcia Yulo santo sa desisyon sang Office of the Ombudsman Visayas bangod sa ‘grave abuse of authority’ kag ‘neglect of duty.’
Ini kasunod sa complaint nga ginfile sang tag-iya sang Luz-Agustin Nalagon Memorial Homes nga si Ramona Nalagon Villaflor sang 2023 nga gindeny ang pag-apply sini sadto sang business permit apisar nga nacomply na sini ang tanan nga requirements kag nabayaran naman ang fees.
Bangod sini, si Yulo kag ang duha ka empleyado sang Municipal government ginmultahan sang katumbas sang anom ka bulan nga sweldo. Sa ipa-Bombo Mo Segment sang Bombo Radyo kay Villaflor, iya naman sa karun ginareklamo ang pagdeny sang renewal sang iya business permit para sa tuig 2026.
Suno diri, sang Enero 7 nag-umpisa ini sa pagproseso sang business permit sa Local Government Unit kag ginhatagan siya sang lista sang requirements.
Suno diri, nacomply na sini ang Barangay clearance, Police clearance, sanitary permit, occupancy permit, kag ang tanan nga iproseso sa Office of the Building Official kag iban pa.
Sang Enero 20, nagpadulong ang iya sekretarya sa Business Permit and Licensing Office (BPLO) kag pagbalik sini may dala na ini nga declination for business permit letter gikan sa Mayor’s Office.
Kasunod sini, nagpadala si Villaflor sang sabat sa opisina apang gin-abisohan siya nga mag-apply bilang new applicant kag indi para sa renewal bisan nga tuig 2021 pa ini nag-umpisa sa pagnegosyo.
Dugang pa sini, nagpadulong pa siya sa iban nga banwa para lamang mamangkot kun insakto ang ginaproseso niya para sa business permit kag siya ginhambalan nga may iban nga indi na kinahanglan pa nga iprocess.
Gin-athag man sini, nga wala siya nagapang-into apang nagatransaction lamang para sa permit sang iya negosyo.
