Wala nagapati ang napatyan sang 15 ka manok sa Concepcion Subdivision, Barangay Caduhaan, ciudad sang Cadiz, nga singgarong ang suspek kag padayon ini nga nagapati nga aswang ang may kahimuan sa pagpamatay sang ila manok, kaagahon sang Lunes.
Sa interview sang Bombo Radyo kay Lovely Villasor, imposible para sa iya nga singgarong ang nagpatay sa mga manok bangod nga naurot patay ang 15 nila ka manok kun sa diin iban ang wala na sang kasudlan, wala na sang ulo, wala sang dugo kag iban balahibo, pakpak ukon tiil na lang ang makit-an.
Madumduman nga ginsaysay sini nga alas 4:00 sang kaagahon sang nakita nila ang 15 nila ka manok nga inugbulang nga may kabug-usan nga balor nga kapin sa P30,000 ang lunsay mga patay na.
Suno diri, wala ini nagapati sa aswang, apang alas 12:00 sang kaagahon may nakita ini nga babayi nga pula ang mata, itom, kag malaba ang buhok nga nagapungko sa kilid sang ila balay.
Gilayon naman sini nga gintawag ang iya amay kag kapin alas 4:00 sang kaagahon nasapwan na lamang nila ang mga manok nga lunsay mga patay na.
