Ginpablotter sang tag-iya sang isa ka tiyangge ang nagkawat sang iya nga cellphone nga isa ka barker sang salakyan nga suno sa tag-iya, ginhatagan pa ini sang P30 nga ginpangayo.
Sa interview sang Bombo Radyo kay Jaime Padol, tag-iya sang tiyangge sa 23rd Lacson Street, Bacolod City, alas 11:00 sang gab-i sang nagakatulog ini, iya nabatyagan nga may tawo sa atubang sang iya tiyangge gani nag-igham si Padol bilang pahibalo nga may yara sang tawo sa sulod.
Nagsabat ang suspetsado nga si Raymond Esquilla, yara sa legal nga edad, kag residente sang Barangay Banago.
Suno kay Padol, madugay na sila nga kilalahay ni Esquilla nga masami nagatambay sa iya nga tiyangge kag nagautang sa iya.
Pahayag ni Padol, sang nabatian ni Esquilla nga may tawo sa sulod sang tiyangge nagsulod man ini nga may bitbit nga plastic.
May ginduhol si Esquilla nga tomato sauce kay Padol kag siya ang ginpamangkot kun may yara ini sang gina-inom nga maintenance.
Ginduhol ni Esquilla kay Padol ang plastic kag katapusan sini nga ginhatag amo ang casing sang cellphone, ginkuha ni Esquilla ang cellphone ni Padol kag gintesting kun makaigo ini sa casing.
Ginbalik ni Esquilla ang cellphone nga nagakulob gani wala nanotisyaran nga wala na gali ang cellphopne kag casing lang ang ginbilin.
Antes, maghalin ang supetsado nangayo pa ini sang P30 pesos kag siya ang ginhatagan ni Padol.
Sang nakit-an nga wala na ang cellphone, ginlagas pa sang biktima ang suspetsado apang wala na sini naabtan.
