Nahangpan sang Corporate Communications Head sang National Grid Corporation of the Philippines (NGCP) Western Visayas ang reklamo sang mga pumuluyo sa natabo nga fluctuation kag pagkatrip-off sang kuryente sa rehiyon kagab-i.
Sa interview sang Bombo Radyo Bacolod kay Michelle Visera, ang pinakaulihi nga nahatagan sang power supply sa Negros Occidental amo ang Bacolod-Bata substation alas-8:48 sang gab-i samtang nafully energized naman ang Panay island pasado alas-12:00 na kaina sang kaagahon.
Paathag sini nga ang grassfire malapit sa ila NGCP substation sa Iloilo ang wala naka-apekto sa supply sang kuryente, kag ang power interruption ang tuga sang pagkadula sa linya sang Panay Energy Development Corporation (PEDC) Unit 1 kag 2, ang coal power plant sa Iloilo City nga nagresulta sa pagkadula sang 316 megawatts nga power supply.
Pahanumdom ni Visera nga yara pa sa preventive maintenance ang Palm Concepcion Power Corporation (PCPC) tubtob sa katapusan sang Marso, nadugangan pa sang duha ka mga planta gani nagluntad ang pagkatrip-off sang kuryente kun sa diin may partial blockout gid nga naeksperyensyahan sa Panay.
Aminado ini nga madamo sang naakig bangod sa unplanned power interruptions, apang ginpasalig sini nga ginatinguhaan sang NGCP Western Visayas nga gilayon mabalik ang power supply.
Pahanumdom sini nga tatlo ang player sa power industry nga ginalakipan sang power plants, ang NGCP nga amo ang nagapadala sang kuryente padulong sa mga Electric Cooperatives.
Suno diri, wala sang mahimo ang NGCP kun wala sang power supply nga magasulod gikan sa power plant, gani sila ang nagapatuman sang manual load dropping.
Sa pagbalik sang linya sang mga planta, amat-amat man nila ini nga ginaload sa feeders sang mga Electric Cooperative.
Ginatinguhaan man sang mga ini nga matapos ang Cebu-Negros-Panay project nga natalana matapos antes ukon sa katapusan sang Marso.
Ini bangod ang karun nga submarine cable ang sarang lamang makapakarga sang 138 kb sang kuryente apang ang bag-o nga ginatukod ang maka-akumodar sang 280 kb.
