Gina-abi abi sang matriarch sang Yanson family ang ginatanyag nga reconciliation sang iya bata nga si Roy sa tunga-tunga sang gumuntang sang ila pamilya.
Madumduman nga nagligad nga Agosto 19, nagpanawagan si Roy sa iya kauturan nga sanday Ma. Celina, Emily, Ricardo Jr., Jeanette kag Leo Rey nga untatan na nila ang inaway kag pag-agaway sa pwesto.
Ini ang kasunod sang ginpatigayon nga special stockholders meeting kun sa diin liwat ginbutang nga presidente sang Yanson Group of Bus Companies si Leo Rey.
Sa interview sang Bombo Radyo Bacolod sa abogado ni Leo Rey nga si Atty. Norman Golez, ginpahayag sini nga gina-welcome sang iya kliyente ang panawagan ni Roy basta nga sundon sini ang tatlo ka mga kondisyon sang ila iloy nga si Olivia.
Ang nasambit nga mga kondisyon ang ginalakipan sang pagbalik sang shares sang matriarch sa kompaniya, ang iya nga voting rights kag dapat nga ibutang sa papel ni Roy ang iya hinambalan ukon dapat may pirmahanay nga matabo.
Suno kay Atty. Golez, indi na bag-o ang panawagan sang kamagulangan nga bata para sa reconciliation nila nga magpamilya gani mas maayo kun may yara sang pirmahanay.
Nahibaluan nga sa tunga sang gumuntang sang pamilya nga tag-iya sang pinakadako nga bus company sa Pilipinas, natunga sa duha ka kampo ang mga ini.
Ang iloy nga si Olivia kag kabataan nga sanday Leo Rey kag Jeanette ang nagdampiganay samtang sa pihak naman sanday Roy, Ma. Celina, Emily kag Ricardo Jr.
