Maga-umpisa na subong nga adlaw ang pagpatuman sang tatlo ka bulan nga fishing ban sa baybayon sang Western Visayas.
Sa interview sang Bombo Radyo Bacolod kay Commander Jansen Benjamin sang Philippine Coast Guard Station – Northern Negros Occidental, ginadumilian sang Bureau of Fisheries and Aquatic Resources (BFAR) ang pagdakop sa mga tuloy, tamban, tabagak, balantiyong, guma-a, bulao, kag hasa-hasa umpisa subong nga adlaw tubtob sa Pebrero 15.
Suno diri, ang bulan sang Nobyembre tubtob sa Pebrero sa masunod nga tuig amo ang mating season sang mga nasambit nga isda.
Paagi sa fishing ban mahatagan sang kahigayunan ang mga isda nga makapadamo sang ila populasyon.
Nasulod sa closed season ang Northern part sang Negros Occidental sa bahin sang EB Magalona, Victorias City, Manapla, Sagay City, Cadiz City, kag Escalante City; Northern part sang Iloilo sa bahin sang Barotac Nuevo, Anilao, Banate, Barotac Viejo, Ajuy, Concepcion, San Dionisio, Batad, Estancia, Balasan, kag Carles; Capiz sa bahin sang Roxas City, Pilar, Pontevedra, Pres. Roxas kag Panay; kag Bantayan Island sa Cebu province.
