BACOLOD CITY — Tatlo tanan ka mga examinees halin sa Negros Island Region ang nalakip sa Top 10 sang 2016 Bar Examinations nga ang resulta ginpagwa sang Korte Suprema subong nga adlaw sang Miyerkules.
Lunsay mga estudyante sa Silliman University sa ciudad sang Dumaguete ang nakasulod sa Top 10.
Yara sa ikaduha nga pwesto si Alanna Gayle Ashley Khio nga may 88.95 percent nga rating; number 9 si Marie Chielo Ybio nga may 87.50 percent nga rating; samtang number 10 naman si Andrew Stephen Liu nga may 87.45 percent nga rating.
Nagpanguna sa 3, 747 ka mga passers ang graduate sang University of San Carlos sa Cebu nga si Karen Mae Calam nga may 89.05 percent.
Ini ang labing una nga kahigayunan nga wala sang Law School sa Metro Manila nga nakasulod sa Top 10.
Nahibaluan nga kabug-usan nga 6, 344 ka graduates ang nagkuha sang Bar exams ukon katumbas sang 59.06 percent.
Ang amo nga pasinawan ang ginhatag sang bulan sang Noviembre sa University of Santo Tomas.
Ang bag-o nga mga abugado ang magasumpa sa Mayo 22 sa Mall of Asia Arena, las 3:00 ang takna sa hapon.
