Tatlo ka grass fire incident ang nagluntad sa ciudad sang Bacolod subong nga adlaw.
Sa interview sang Bombo Radyo Bacolod kag Fire Officer 1 Paul Servano, public information officer sa Bacolod City Fire Station, ang tatlo ka grass fire ang nagluntad sa Purok Mabinuligon sa Barangay Handumanan, bag-ong dalan sa Barangay Cabug kag Purok Active sa Barangay Mandalagan.
Apang magluwas diri, nagluntad man ang dako nga sunog sa boundary sang Bacolod kag Talisay City.
Suno kay Servano, mayorya sang kalayo ang naghalin sa area nga sakop sang Talisay City kag gamay lamang ang nahalitan sa bahin sang Barangay Banago, Bacolod City.// Suno diri, ang area ang nagdangat sa masobra 2 hectares.
Aminado ini nga dako ang ginsaka sa numero sang mga fire incidents subong nga tuig kun ipaanggid sa kaangay nga bulan sang 2023.
Ang reported fire incidents ang nagdangat sa 135 apang mas dako ang numero sang recorded fire calls.
Sang Marso lamang, 130 ang fire calls kag mayorya sa mga kaso ang grass fire.
Suno kay Servano, kalabanan sa mga insidente ang tuga sang pagpanutod, gani ginapanawagan sang mga ini nga likawan anay ang pagpanutod.
Dugang pa sini nga sa masami, ang magamay lamang nga kalayo gikan sa pagpanutod ang madasig maglapta tubtob mangin malapad nga sunog bangod sa tuman nga kainit dala sang El Niño.
Pangabay man ni Servano sa mga ginikanan nga bantayan ang mga kabataan nga indi makahampang sang posporo ukon kandila nga mahimo halinan sang sunog.
Samtang dapat man nga ihaboy sa nagakaigo nga basurahan ang mga upos sang sigarilyo, apang seguruhon man nga ini ang wala na nagabaga.
