Gilayon nga nadakpan sa ginpatigayon nga hot pursuit operation ang tatlo ka mga suspetsado nga nagpang-hold up sa isa ka lalaki sa ciudad sang Talisay, nagligad nga Agosto 17.
Una diri, nakuha sa biktima nga si Dominador Labao ang iya payroll money nga nagabalor sang masobra 153 mil pesos kag isa ka laptop.
Sa interview sang Bombo Radyo Bacolod kay P/ Lt. Col. Boots Aseo, hepe sang Talisay City Police Station, nadakpan sanday Christian Dayuno, 25-anyos sang Brgy. Zone 3, Talisay City; Martin Katigan, 34-anyos kag Ronnel Salbiba, 23-anyos kag lunsay residente sang Hda. Ambulong, Brgy. San Fernando sang nasambit nga ciudad sa Purok Katumbal, Brgy. 5, Bacolod City pasado alas-11:00, Sabado sang gab-i.
Suno kay Aseo, naga-coordinate sila sa tanan nga mga police station sa probinsiya lakip na sa ciudad sang Bacolod agud maaresto ang mga suspetsado.
Nagtimbre sa ila ang Police Station 4 nga nakit-an ang tatlo nga naga-inom-inom sa guwa sang boarding house ni Katigan.
Nakilal-an gilayon ang mga ini bangud wala sila naggamit sang bonnet sang nanghold-up sila kag ginkilala man sila sang biktima sa rouges gallery sang kapulisan.
Nakuha man sa paghinakop sang mga suspetsado ang .38 caliber revolver, sulpak, tatlo ka live ammunition kag isa ka bulto sang shabu.
Ginatudlo man ang mga ini nga suspetsado sa pila ka mga hold-up incidents sa Bacolod, Silay kag Talisay.
Sa karon, preso ang mga ini sa Talisay City PNP kag ginahibalo pa kun kabahin sila sa pagpanghold-up sa Haoling kag F&C Jewelry Stores sa Gaisano Grand Mall sang nagligad nga Agosto 7.
