Nagpanindugan ang isa ka team leader sang RGS World Marketing Corporation nga indi isa ka investment scheme ang ila nga negosyo.
Sa interview sang Bombo Radyo sa isa ka team leader diri sa Bacolod City nga naghingyo nga indi paghingadlan, tatlo ka bulan na ini nga nagaubra sa RGS.
Suno sa iya, may yara na ini sang una sang regular nga ubra apang nagresign siya agud mag-apply sa RGS.
Pagkatapos sang interview kag screening, nakasulod ini bilang isa ka team leader kag sa karun, nagahulat na lang sang iya ikatatlo nga commission.
Suno sa iya, commission ang insakto nga term sa kwarta nga ginabalik sa ila kag indi “pay-out” bangud indi ini investment scheme.
Suno diri, ang P1,000 nga ila ginahatag ang para sa membership kag ang ginabaton nga P3,500 amu ang ila nga commission.
Suno diri, dako ang nabulig sang RGS sa iya pagpangabuhi kun ikumparar sa napulo ka tuig sini nga serbisyo bilang isa ka empleyado.
Gindugang man sini nga may yara sila sang foundation ukon charity drive agud magbulig sa mga nagakinahanglan.
Madumduman nga ginpahayag sang Securities and Exchange Commission (SEC) nga may penalidad nga paga-atubangon ang RGS World Marketing Corporation kun mapamatud-an nga naglapas ini sa layi.
