BACOLOD CITY – Wala nagpalingkang sa kadakuon sang ila kontra ang softball team sang Pilipinas nga tiglawas sang Asia-Pacific region sa una nila nga hampang sa Senior League Softball World Series sa Estados Unidos Miyerkules nga adlaw.
Ginlampaso sang Negros Occidental Philippines Senior League ang ila duha ka kasumpong sa Pool A sang prestihiyoso nga torneyo Miyerkules sang aga.
Sa first game, wala naka-iskor ang ASOFEM Senior League gikan sa Maunabo, Puerto Rico nga tiglawas sang Latin American region sa hampang nga nagsugod alas 5:30 sang kaagahon.
Natapos ang match sa score nga 7-0 pabor sa Pilipinas.
Wala nagpapierde sa kakapoy ang Philippine team bisan sunod-sunod ang ila nga hampang bangud sa ikaduha nga game alas 8:00 sang aga, ginpakahuy-an sini ang District 18 Senior League nagikan sa Haverstraw, New York City nga tiglawas sang East region matapos nagdaog sa score nga 5-0.
Dalagko ang kasumpong sang Negrense players nga naga-edad 14 tubtub 16 anyos apang nasarangan nila ang kabakod sang kontra kag nagdaog.
Ang hampang ang ginpatigayon sa Bruce Layton Field sa Lower Sussex, Delaware sa Estados Unidos.
Alas 12:30 buwas sa kaagahon, oras sa Pilipinas, atubangon sang pungsod ang Vidalia Girls Softball Senior League nagikan sa Vidalia, Louisiana nga tiglawas sang Southwest region.
