Ginkakibot sang isa ka pamilya sa Jordan, Guimaras nga makit-an sa ila balay ang isa ka unique nga tiki nga indi lang isa apang duha ang ulo sini.
Suno kay Ervin Labastre Isogon, nakita sang iya hinablos ang gamay nga tiki nga una sini ginpatihan nga yab-ok lang sa kurtina, apang sang liwat sini nga gintskeyar didto na natukiban nga may tiki nga may duha ka ulo nga nagakamang sa ila kurtina.
Ginkuha nila ini kag ginbutang sa container kag gin-atipan.
Suno sa mga experts, bicephaly ang tawag kun may duha ka ulo ang isa ka sapat.
Ini nagakatabo kun indi mahimo ang split sa isa ka embryo nga dapat kun tani mangin kapid.
Kag ini masami nagakatabo sa mga reptiles sang sa mga mammals.
Suno pa diri, manubo ang tsansa nga mabuhi ang sapat nga may bicephaly, apang may tsansa mabuhi ang ini nga mga specimen kun yara sa captivity ukon pag-atipan sang tawo.
Ang tiki nga nadakpan sang hinablos ni Isogon, nabuhi sa sulod sang duha ka semana kag ginbawian sang kabuhi.
Ini ginkasubo sang pamilya Isogon apang ila naman ginkalipay nga bisan papaano naka-atipan sila sang specimen nga tumalagsahon lang makit-an sa kalibutan.
