Subong nga Sabado, All Saints’ Day, alas-3:00 kaina sang kaagahon, ang ginamonitor nga Low Pressure Area sa sulod sang Philippine Area of Responsibility ang ulihi nga nasiplatan sa 275 km sa nakatungdan sang Coron, Palawan.
Manubo ang tyansa nga ini ang mangin Bagyo kag nagahulag padulong sa nakatungdan nga dereksyon palayo na sa Pilipinas.
Apang subong nga adlaw, lauman nga ini ang makatuga pa sang mga pag-ulan sa Kalayaan Island, Palawan.
Ang LPA ang yara man sa sulod sang Intertropical Convergence Zone ukon ang linya kun sa diin nagasugat-anay ang hangin gikan sa Northern kag Southern Hemisphere.
Ang ITCZ ang nagaapekto naman sa Southern Luzon, Visayas kag Mindanao.
Apang kun ikumparar sa nakaligad nga mga inadlaw, mangin maiwat na ang mga pag-ulan apang yara gihapon ang mga posibilidad sang gulpyada kag makadali nga pag-ulan ukon localized thunderstorms.
Ang Northeast Monsoon ukon Hangin Amihan ang magaapekto gihapon sa Extreme Northern Luzon kag magatuga sang mahinay nga pag-ulan ukon pagpanalithi sa bahin sang Batanes.
Ang LPA nga ginamonitor sa gwa sang PAR ang nadevelop na bilang Tropical Depression alas-2:00 kaina sang kaagahon.
Ang Bagyo ang ulihi nga nasiplatan sa 1,430 km sa nasidlangan sang Northeastern Mindanao.
Dala sini ang hangin nga nagadangat sa kabaskugon nga 45 km/h kag pagmadlos nga tubtob 55 km/h.
Ang Bagyo ang nagahulag padulong sa nakatungdan nga dereksyon sa kadasigon nga 15 km/h.
Sa karun ang Bagyo ang wala pa nagaapekto sa diin man nga bahin sang pungsod.
Gani lauma nga subong nga UNDAS, manubo ang tyansa sang mga pag-ulan sa dako nga bahin sang pungsod.
Apang yara gihapon ang posibilidad sang mga isolated ukon tumalagsahon nga mga pag-ulan gani mas maayo nga magbalon sang panaming sa ulan sa pagpadulong sa mga sementeryo.
Sa Lunes, kadungan sa pagbalik gikan sa long weekend, lauman nga mangin maulanon ang panahon sa dako nga bahin sang pungsod partikular na sa Southern Luzon, Visayas kag Mindanao bangod sa Bagyo, kasubong man sa Trough ukon Extension sang Bagyo upod sa Shearline nga magaapekto sa dako nga bahin sang Luzon.
Ginalantaw nga magasulod sa PAR ang Bagyo bwas sa aga ukon sa hapon.
Sa pagsulod sa PAR, ang Bagyo ang hingadlan nga Tropical Depression TINO.
Ang Bagyo ang ginalauman nga mapadulong sa nasidlangan sang Visayas kag Mindanao kag mahimo maglandfall sa Eastern Visayas ukon Caraga area sa Martes sa aga.
Apang kun magdasig ang hulag, mahimo nga maglandfall na sa Lunes sang gab-i.
Samtang sa Martes tubtob MIyerkules, ginalantaw nga tabukon sini ang Visayas kag Mimaropa area kag makagwa na sa West Philippine Sea sa Miyerkules.
Ginalantaw pa nga magbaskog ang Bagyo kag mangon Thypoon category antes maglandfall.
